Një seri trajnimesh u përmbyllën me sukses  me bashkitë lidhur me inspektimin dhe kontrollin mjedisor të organizuar nga OSCE me financim nga Norvegjia, Franca dhe Italia.

Këto trajnime kishin si qëllim adresimin e sfidave dhe mundësitë e përmirësimit të menaxhimit të mjedisit në nivel vendor si dhe të rrisë bashkëpunimin ndërmjet institucioneve për të luftuar krimin mjedisor.

Ekspertët e mjedisit paraqitën kuadrin ligjor dhe institucional, si dhe sfidat që hasin bashkitë në menaxhimin e pyjeve, ujit, mbetjeve dhe ndotjes duke theksuar rëndësinë e krijimit të strukturave të përshtatshme për të trajtuar këto çështje. Fokusi gjithashtu u vendos në përmirësimin e procesit të inspektimit mjedisor dhe përdorimin e teknologjive moderne, siç është portali “e-Inspektimi” për të monitoruar dhe kontrolluar më efektivisht aktivitetet që ndikojnë në mjedis. Një faktor i cili do të lehtësonte dhe kontrollin nga Qeveria Qendrore është unifikimi i strukturave të drejtorive të pyjeve dhe kullotave nëpër bashki, struktura të sugjeruara dhe nga MSHPV.

U evidentua dhe nevoja për ndryshime ligjore për kompetencat e bashkive mbi zonat e mbrojtura, vështirësitë në menaxhimin e pyjeve dhe kullotave për shkak të mungesës së stafit, dhe mungesën e strukturave për menaxhimin mjedisor në disa bashki. Po ashtu u diskutua edhe mungesa e pajisjeve për matjen e zhurmave, një problematikë që shqetëson në veçanti banorët e bashkive.

Këto aktivitete shënojnë një hap të rëndësishëm në përpjekjet për krijimin e një menaxhimi mjedisor më të qëndrueshëm dhe efektiv në nivel lokal duke forcuar bashkëpunimin midis institucioneve dhe NJVV-ve.