Takimi i zhvilluar në bashkinë Elbasan shënoi nisjen e prezantimit të tryezave tematike, ku u paraqitën gjetjet kryesore të Raportit të Performancës 2023 dhe u shpjegua Mekanizmi i Grantit të Bazuar në Performancë. Fokusi kryesor i kësaj tryeze ishin financat lokale, duke evidentuar arritjet dhe sfidat e tyre.

Një dekadë pas implementimit të Reformës Administrativo-Territoriale, bashkitë kanë bërë përparime të rëndësishme në forcimin e autonomisë së tyre financiare dhe në rritjen e rolit të tyre në zhvillimin ekonomik. Të ardhurat e veta për frymë janë rritur ndjeshëm, nga 4,634 lekë në vitin 2015 në 14,527 lekë në vitin 2023, ndërsa investimet për frymë kanë shënuar një rritje prej 78%. Gjithashtu, është arritur një reduktim i ndjeshëm i detyrimeve të prapambetura të bashkive, të cilat janë ulur me 7 miliardë lekë. Ky progres reflekton përpjekjet e vazhdueshme për përmirësimin e menaxhimit financiar dhe optimizimin e burimeve, duke reduktuar varësinë nga transferta e kushtëzuar dhe rritur financimin me të ardhurat e veta.

Zbatimi i metodologjisë së re për matjen e performancës, në kombinim me mbështetjen përmes Grantit të Bazuar në Performancë, ka hapur mundësi të reja për avancimin e standardeve të qeverisjes vendore. Mekanizmi i GBP përbëhet nga disa kushte kryesore, përfshirë përgatitjen dhe miratimin e gjashtë planeve vendore, si dhe realizimin në kohë dhe me të dhëna të sakta e të besueshme të procesit të matjes së performancës. Për sa i përket menaxhimit financiar GBP ka edhe plotësimin e tre kushteve financiare që lidhen me realizimin e buxhetit, zvogëlimin e detyrimeve të prapambetura dhe rritja e mbledhjes së taksës së pasurisë së paluajtshme.

Ky mekanizëm u mundëson të gjitha bashkive të plotësojnë kriteret për përfitimin e tij, duke krijuar hapësira të reja për përmirësimin e cilësisë së shërbimeve për qytetarët dhe forcimin e kapaciteteve të qeverisjes vendore. Në fund të takimit u zhvillua një diskutim i hapur lidhur me përmirësimin e treguesve në raundin e ardhshëm të SMP duke u fokusuar në nevojat e problemet konkrete më të cilat hasen bashkitë.