Takimi i fundit mbi tryezat tematike, ku u prezantuan arritjet kryesore të Matjes së Performancës dhe Mekanizmit të Grantit të Bazuar në Performancë, u zhvillua në bashkinë Berat. Fokusi kryesor i kësaj tryeze ishin burimet njerëzore, transparenca, përfaqësimi gjinor dhe projektet me gjetjet përkatëse.

Një nga sfidat kryesore me të cilat përballen bashkitë lidhet me rekrutimin e një stafi të specializuar dhe ofrimin e mundësive për trajnime në fushat përkatëse. Kjo është pasojë e ndryshimeve demografike dhe nivelit të lartë të migrimit të brendshëm. Në këtë kuadër, MSHPV ka ndërmarrë nismën për rritjen e pagave me mbështetje nga qeveria, si dhe ngritjen e Akademisë për Pushtetin Vendor, e cila do të vlerësojë nevojat për trajnime të stafit të NJVV-ve.

Transparenca mbetet një pikë e fortë, duke garantuar përfshirje të lartë të qytetarëve në proceset e vendimmarrjes dhe krijuar mundësi më të mira për angazhimin e tyre në zhvillimin e qytetit. Sa i përket përfaqësimit gjinor, shënohet një nivel i kënaqshëm prej 44% të grave në pozicione drejtuese në bashki, duke kontribuar në forcimin e barazisë gjinore.

Një fushë me potencial për zgjerim është përfitimi nga projektet e financuara nga donatorët, duke marrë si praktikë të mirë Bashkinë Berat. Ky aspekt mund të fuqizohet më tej duke i dhënë një fokus të shtuar integrimit evropian dhe trajnimeve për aplikimin në këto projekte.

Në kuadër të Mekanizmit të Grantit të Bazuar në Performancë në fushën e mirëqeverisjes, përfitimi i bashkive është i kushtëzuar nga përmbushja e dy kritereve kryesore: hartimi dhe zbatimi i Planit Gjinor dhe Planit të Integritetit. Në këtë kontekst, çdo bashki ka mundësinë të pajiset me këto plane, të cilat përbëjnë kushte të domosdoshme për përfitimin e grantit dhe që aktualisht mungojnë. Përmbushja e këtyre kushteve do të shpërblehet në përputhje me kriteret e përcaktuara. Në fund të takimit u zhvillua një diskutim i hapur lidhur me përmirësimin e treguesve në raundin e ardhshëm të SMP duke u fokusuar në nevojat e problemet konkrete më të cilat hasen bashkitë.