Trajnimi mbi hartimin, zbatimin dhe vlerësimin e planeve vendore të veprimit për barazinë gjinore u organizua në kuadër të projektit “Bashkimi Evropian për Barazinë Gjinore në Shqipëri II” nga Ministria e Shtetit për Pushtetin Vendor, Agjencia e Mbështetjes së Vetëqeverisjes Vendore dhe UN Women.

Në fillim të trajnimit, Znj. Olta Caca, Drejtor në Drejtorinë e Statistikave dhe Performancës, AMVV prezanoti Grantin e Bazuar në Performancë, ndërsa pjesëmarrësit patën mundësinë të ndanin perceptimet e tyre mbi barazinë gjinore dhe të njiheshin me konceptet thelbësore. U trajtuan përkufizimet kyçe dhe rëndësia e barazisë gjinore në nivel vendor, duke theksuar ndikimin që ajo ka në zhvillimin social dhe ekonomik të komuniteteve.

Gjatë sesioneve të mëvonshme, u diskutua mbi Kartën Evropiane për Barazinë Gjinore, një udhëzues i rëndësishëm për njësitë e vetëqeverisjes vendore në Shqipëri. Një tjetër aspekt i rëndësishëm i trajnimit ishte përdorimi i statistikave gjinore dhe treguesve për vlerësimin e planeve të veprimit. Pjesëmarrësit u njohën me rëndësinë e analizimit të të dhënave të ndara sipas gjinisë dhe mënyrën se si këto statistika ndihmojnë në formulimin e politikave efektive dhe të bazuara në fakte. Përmes shembujve praktikë, u diskutua mbi interpretimin e statistikave dhe aplikimin e tyre në nivel lokal.

Trajnimi u mbyll me një përmbledhje të çështjeve kryesore të trajtuara, duke u fokusuar te përmirësimi i kapaciteteve të institucioneve vendore për hartimin dhe zbatimin e planeve efektive për barazinë gjinore. Pjesëmarrësit patën mundësinë të ndanin përshtypjet e tyre dhe të plotësonin formularët e vlerësimit, duke ofruar sugjerime për përmirësimin e iniciativave të ardhshme në këtë fushë.