Në kuadër të zbatimit të mekanizmit të Grantit të Bazuar në Performancë (GBP) 2026 dhe procesit të raportimit të Sistemit të Matjes së Performancës (SMP) 2025, Agjencia për Mbështetjen e Vetëqeverisjes Vendore (AMVV) organizoi tre trajnime rajonale me përfaqësues të njësive të vetëqeverisjes vendore.

Trajnimet u zhvilluan në datat:

• 30 qershor 2026 – Lezhë
• 1 korrik 2026 – Elbasan
• 2 korrik 2026 – Fier

Në këto aktivitete morën pjesë përfaqësues të bashkive nga rajonet përkatëse, përfshirë drejtues vendorë, koordinatorë të performancës, si dhe përfaqësues të strukturave përgjegjëse për buxhetin, financat dhe ofrimin e shërbimeve vendore.

Gjatë trajnimeve u prezantua mekanizmi i Grantit të Bazuar në Performancë (GBP) 2026, duke u trajtuar në mënyrë të detajuar komponentët e grantit, kriteret e vlerësimit dhe procedurat e aplikimit. Gjithashtu, u diskutua lidhja ndërmjet GBP 2026 dhe Sistemit të Matjes së Performancës (SMP) 2025, me fokus treguesit e rinj të përfshirë në mekanizëm dhe rolin e tyre në vlerësimin e performancës së bashkive.

Pjesëmarrësve iu prezantuan ndryshimet dhe shtesat në treguesit e SMP 2025, si dhe metodologjia e re për raportimin e tyre. Në mënyrë të veçantë, u dhanë sqarime mbi burimet e të dhënave, institucionet përgjegjëse për raportim dhe mënyrën e plotësimit të kërkesave të përcaktuara.

Një pjesë e rëndësishme e trajnimeve iu kushtua diskutimit të problematikave të hasura gjatë procesit të raportimit të SMP 2024 dhe ndarjes së rekomandimeve për përmirësimin e cilësisë, saktësisë dhe plotësisë së të dhënave të raportuara nga bashkitë.

Gjatë sesioneve praktike, pjesëmarrësit u përfshinë në diskutime mbi raste konkrete, duke marrë sqarime lidhur me interpretimin e treguesve të performancës, dokumentacionin mbështetës dhe kërkesat metodologjike të raportimit. Gjithashtu, u adresuan pyetjet dhe komentet e përfaqësuesve të bashkive lidhur me zbatimin e kritereve të Grantit të Bazuar në Performancë dhe procesin e raportimit të të dhënave.

Në përfundim të ciklit të trajnimeve, përfaqësuesit e bashkive u pajisën me informacionin dhe udhëzimet e nevojshme për zbatimin e kërkesave të reja të GBP 2026 dhe raportimin e SMP 2025, duke kontribuar në forcimin e kapaciteteve institucionale të njësive të vetëqeverisjes vendore dhe në rritjen e cilësisë së raportimit të performancës vendore.